6戰不敗防守硬淨
南球盃淘汰賽喺周五朝早，將會舉行附加賽首回合，由智甲球會柏利斯天奴主場，迎戰巴甲球會古亞巴。古亞巴今季喺巴甲雖然成績麻麻，不過踢南球盃就相當醒神，今屆6場分組賽從未輸過，當中3場作客只係失過1球，預計今場會繼續利用頑強防守嚟抗衡主隊，務求先唔失波，2.5球入球細值得捧場。

（周五早上6時開賽）
柏利斯天奴今屆原本踢自由盃，不過分組賽就出局，只能以小組第3「空降」南球盃；事實上柏利斯天奴實力只係一般，佢哋上屆踢南球盃同樣都喺分組賽出局。

柏利斯天奴易帥立立亂
此外，佢哋近期亦受到易帥影響搞到亂七八糟，主帥山齊士突然宣布離隊，舒華加頂咗一陣又搵阿根廷教頭波華基利奧接手，球員肯定難以適應。

另邊廂，古亞巴依家喺巴甲位處下游，但佢哋踢法相當穩陣，南球盃6場分組賽3勝3和只係失過3球，防守力有一定保證。料古亞巴今場作客會先求穩，以不敗為目標；佢哋今屆6場南球盃當中，有5場總入球開2球或以下，而近4場作客比賽，亦有3次總入球少過3球，捧2.5球入球細好穩陣。